 |
| Foto : Cikwo Isna Adianti |
Lamban Tuha Sandaran Agung
di Pekon Sukarami/Umbul Limau Kecamatan
Balik Bukit Lampung Barat
Menurut cerita jak jelma
sai tuha-tuha di pekon Lamban Tuha
Sandaran Agung ji umorni adu lebih jak 91 tahun.
Mak nggedok data sai pasti tanggal pira Lamban Tuha Sandaran Agung ji
tisani, aga ngeluleh jama sai jadi saksi hidup Lamban ji waktu ti tegakko adu mak ngedok
lagi. Jak jelma sai tuha-tuha di pekon tian ingkah nyawako kik Lamban Tuha
Sandaran Agung ji adu ngeliwati 2 kali kukuk balak yaddodia kukuk Gunung Suoh
tahun 1933 rik kukuk tektonik sai berpusat di sesar semangko sai kekuatanni 6,5
SR terjadi tengah bingi di tanggal 16 Februari 1994.
Masih menurut cerita ni tian sai tuha-tuha, semakkung kukuk tahun 1933 Lamban Tuha Sandaran Agung ji langarni kekira 4 mater jak atas tanoh, kidang mani pas kejadian kukuk 1933 no wat tihangni sai miring, ahirni seunyinni tihanni ti pelok sehingga langgarni injuk tanno tinggal 2 mater jak tanoh.
Wat muneh cerita versi sai bareh nyawako kik Lamban Tuha Sandaran Agungji pas jak kejadian kukuk tahun 1993 yaddo dia rang ngumpulko korban gempa. jak cerita sinji nyimpulko kik Lamban Tuha Sanadaran Agung ji tahan gempa, sungguh kontruksi sai kukuh lain kaleng-kaleng.
Sampai tanno adu tahun 2024 Lamban Tuhan Sandaran Agung ji lagi tegak kukuh, di topang tihanng, hampir seunyinni kayu kemit pulan bebalak drum bekas aspal, sai dibahni wat hutong batu yuh balak-balak bakul sap.
 |
| Foto : Cikwo Isna Adianti |
Reno juga sambungan atau
penemuan sai nemuko hantara kayu sai jama kayu barehni, jarang ngeliak wat
paku. Selain tipahak, lamonno di kuatko ulehni
pasak jak pering tuha sai mawat dacok di kanik bubuk lagi.
Selain tihangni, tahun 80
an Lamban Tuha Sandaran Agung ji di renovasi luwot ulehni Buya Tabrani
Dalil. Dinana sai ti revovasi yaddo dia Dapor,
tengah khesi, panggar, daleh hatokni.
Tengah khesi ni tiganti jama papan kemit baru, panggarni sai jenoni jak khesi pring tiganti muneh jama papan, jama jan pakai cakakni tikeni lemari, kheno muneh
hatokni tiganti seng baru.
Sedangko tata ruangni
Lamban Tuha Sandaran Agung ji ngedok pepira bagian sai seunyinni sesuai jam
fungsini tenggalan-tenggalan yaddo dia : bagian hadap wat lepau lunik uluni jan, Lepau balak, lapang luar,
lapang tengah, Kebik, panggar, serudu,
dapor, rik garang.
Keberadaanni Lamban Tuha
Sandaran Agung Ji, bagi ni anak umpuni
Dahusin (keluarga Besar Raja Bintang Paksi) rik Umpuni Saksi Mengunang sai wat
di pekon Umbul Limau pada umumni : Umpuni Dahamin, Umpuni Dahalik, Umpuni Darusin, rik
Umpuni Aham tantu sangat bermanfaat,
sebab kak wat guaian adat jarang Lamban Tuha Sandaran Agung Ji mak ti
pakai.
Selain ruanganni sai mubalak dacok ti pakai rangni muli meranai nyambai rik rambak bebura, tumbai di kudanni wat kulam jak semen sai ukuranni kurang lebih 2 M x 2 M, dinana PDAM makkung ngedok, ranglaya mid pangkalan mandi lagi makkung dacok motor tangeh kik aga mubil, nah kak kemarau kulam sinji dia wat pepira ngejan nginjan way.
Disebelah timur sai berbatasan jama pak batin M Barlian wat batang ni teh, saat seno sanak di pekon makkung pandai injuk repa keliakni batang ni teh, teh senolah rang ni tian ngeliak selain jak gambar sai wat di bungkusni teh sai ti beli di warung, perkembangan berikutni lamon sai ngakuk kayu mendalu di batangni teh seno, ani tian aga pakai ubat.
Kik guaian adat biasani
Lepau rang bediker, Lapang luar rang ni bakas/malim, lapang tengah rangni
bebai/sanak. Kebik/kamar rang pedomni raja daleh permaisuri, serudu rang
ngepikko barang-barang, dapor rang ni kebayan ngura rik kebayan tuha masak-masak atau nyani cucor mandan rik kambang loyang, panggar rangni petugas nerima sesuduk
daleh ngator siwok penguloh bakul ni minak muari, garang rang bebasuhan.
 |
| Foto : Kasturi Mawepa |
Sai jelas Lamban Tuha
Sandaran Agung laik hak sekedar Lamban pada umumni, Lamban Tuha Sandaran Agung
yaddo dia Lambanni sai tuha (Raja Bintang Paksi), rangni ngumpulko anak buahni saling
ngeni pendapok dihiasi kasih sayang, rang saling menguatko disaat kena musibah, rang bebagi kak wat guai.
Jak kekukuhanni Lamban Tuha Sandaran Agung ji lain sekdar teliak di mata gawoh, kidang adu terbukti jadi pelindungni anak umpu sekebakni rik muarian balakni Saksi Mengunang. Reno juga kukuhni Lamban Tuha Sandaran Agung negakko kemorian jak tumbay hingga tanno, injuk ya tegak kukuh selamat jak gempa sai nyani bangunan di Liwa pada umumni luluh lantah.
إرسال تعليق