 |
| Ali Rukman |
Dilahegh ko Makni nenggalan mak ngedok sapa-sapa, tanno Makni radu maklagi
Dinana Bakni lagi mulang mit pekon nyepok minyak tanoh..Tanno Bakni radu mak lagi muneh nyusul Makni
Dingunni segala ingingok, kenanya ni ulun, lehot umanat selama ya mejenong di dunia..sai di sandangni jak jaoh rani
Pakpuluh siwa tahun anjak dinana, sanak lungup santor ngeluarko hiting bayu ngebaca diri..sapa nyak, dipa nyak, aga midipa nyak
Mangking ya dilom kehughik'anni
Sesiyah di hati saat ya dilom kebimbangan.
Dilom lapahanni sai mawat pernah nyerah, semapu di tenemu.
Ingingok lagi melunikni sanak lungup
Wat darak ngisi jagung di duarani pekon.
Wat matik jawi..injuk waghahan jaman nabi.
Wat bawakni kayu manis,sai nyani miwang mesakik sampai ulu hati.
Wat meli sepatu sekula jak iwa uleh ngeriding.
Wat cerita rani selasa daleh jemahat.
Wat sangkarni manuk daleh kerita angin pederal.
Wat cerita Palembang rik Tanjungkarang.
Wat muneh kisah di Lampung rik di Jakarta.
Selama puluh tahun lebih cutik sanak lungup mak lagi ngedengis suluyni way di pancor pering
Adu ngeliak berak ni langik.
Jawoh jak lampu damar
Nyimak warah ceghita ni pejuang
Nadah ko culuk di hanggum ni ulum daleh nyepok andananni tian sai melapang hati.
Nunangko hati jama muli jak bambu seribu.
Tanno..
Sanak lungup nenggalan delom tayuhan.
Benapas dilom heghnus
Be-angonan dilom dunia halok ganggu.
Daleh neduh jak ipa angin rik suara mic ni masjid
Tanno..
Sanak lungup nyancan damar, sai mak kepegung dirumpok sai lapah di tengah kelom
Nyandang nyin hati senang.
Nyandang nyin selalu dilom kelapangan hati
Nyandang nyin lapahan mak putus
Ngandang lehot umanat sampai matarani mak kelia'an lagi..
Bekape, 28 September 2024
إرسال تعليق